Alfonbra gorria, eguneroko elkartasun bihurturik
Alfonbra gorria, eguneroko elkartasun bihurturik
Gipuzkoan, gutxien esperotako lekuetatik ere sortzen da elkartasuna. Egun batzuetan kultura, topaketa eta nazioarteko proiekzioa sinbolizatzen duen elementua laguntza praktiko eta gertuko bihurtzen da orain lurraldeko familia askorentzat. Jasangarritasuna, inklusioa eta konpromiso komunitarioa batzen dituen ekimen kolektibo bati esker, Zinemaldiko alfonbra gorriak beste bide bat abiarazi du, guztiz soziala, eta jada bete du lau urteko ibilbidea.
Gipuzkoako Elikagaien Bankuak mila poltsa berrerabilgarri baino gehiago jaso ditu, Donostia Zinemaldiaren azken edizioan erabilitako alfonbra gorria aprobetxatuta. Ekintza hori azkeneko lau urteetan ari dira egiten Gipuzkoako Foru Aldundiko Jasangarritasun Departamentuak bultzatuta, Emaus Gizarte Fundazioarekin eta SpanSet enpresa gipuzkoarrarekin lankidetzan. Era berean, Gipuzkoako Elikagaien Bankuak zuzenean dihardu inplikaturik, erakunde sozial hartzaile gisa.
Lau urte jasangarritasuna eta gizarteratzea batzen
Proiektu hau sendotu egin da edizioz edizio, lurraldeari aplikatutako ekonomia zirkularraren adibide gisa. Martxan jarri zenetik, material enblematiko bati bigarren bizitza bat eman ahal izan zaio jaialdiko alfonbra gorria berrerabiltzeari esker, eta gizarte-ekintzarako baliabide erabilgarri bihurtu da.
Poltsak Emaus Gizarte Fundazioaren gizarteratze- eta laneratze-tailerretan egin dira, jaialdian instalatutako 1.840 metro koadro moketa jasangarri berrerabilita. Material hori osagai % 100 birziklatu eta birziklagarriekin egina da, eta SpanSet enpresa gipuzkoarrak emandako ehun berrerabilia gehitu zaio.
Poltsa horiek egiteko, lan inklusiboko 300 ordu baino gehiago behar izan dira, eta enplegu sozialki arduratsua eta benetako aukerak sortu dira egoera kalteberan bizi diren pertsonentzat. Poltsa bakoitzaren atzean denbora, laguntza eta ikaskuntza-prozesu bat daude, eta indartu egin ditu poltsa egiten parte hartzen dutenen autonomia eta duintasuna.
Ingurumen-inpaktua, axola duten datuekin
Ekimenak lau urte hauetan izaniko ibilbideak, era berean, aztarna positiboa uzten du ingurumenaren aldetik ere. Azken edizio honetan bakarrik, 1.239 kilo CO2 isurtzea saihestu da alfonbra gorria berrerabiltzeari esker, eta, horretaz gainera, 320.000 litro ur baino gehiago aurreztu dira. Zifra horiek lagungarriak dira berrerabiltzearen eta hondakinak murriztearen alde egitearen benetako irismena ulertzeko, eta eguneroko jardunera eramaten dute diskurtsoaren jasangarritasuna.
Gipuzkoako Elikagaien Bankuaren aburuz, ikuspegi hori guztiz bat dator elikagai gutxiago xahutzeko eta baliabideak arduraz erabiltzea sustatzeko konpromisoarekin, betiere pertsonak erdigunean jarrita.
Elikagaiak banatzeko laguntza zuzena
Gipuzkoako Elikagaien Bankuarekin lankidetzan aritzen diren gizarte-entitateen sareak poltsa horietan banatuko dizkie elikagaiak familiei. Funtzio praktikoaz harago, gizarte-laguntza ulertzeko beste modu bat dira poltsak, integratu egiten baitituzte jasangarritasuna, berrerabiltzea eta errespetua.
Poltsa berrerabilgarriak eta erresistenteak izateak erraztu egiten du eguneroko lan logistikoa, eta hobetu egiten du elikagaiak biltzera joaten diren pertsonen esperientzia. Elementu errazak dira, baina oso baliotsuak, eta lagungarriak dira laguntza erosoago eta duinago iritsi ahal izateko.
Gure presidente Belén Méndez de Vigok bereziki eskertu du urteroko dohaintza hau: “Horrelako ekimenei esker, indartu egiten dugu familia kalteberenekin egiten dugun eguneroko lana, eta uztartu egiten ditugu elkartasuna, jasangarritasuna eta lankidetza soziala. Poltsa horiek, elikagaiak banatzea errazteaz gainera, indartu egiten dute elikagaien aprobetxamendu arduratsuarekin eta hondakinak murriztearekin dugun konpromisoa, eta, hala, ekonomia zirkularraren printzipioak txertatzen ditugu gure gizarte-ekintzan”.
Lurraldean batzeko lankidetzan aritzea
Poltsak banatzeko ekitaldian izan ziren Gipuzkoako Foru Aldundiko Jasangarritasun Departamentuko, Donostia Zinemaldiko, Emaus Gizarte Fundazioko, SpanSeteko eta Gipuzkoako Elikagaien Bankuko ordezkariak. Topaketa horrek ederki islatzen du lurraldeko erakunde publikoen, gizarte-entitateen eta enpresen arteko lankidetzan oinarritutako lan egiteko modua, helburu partekatu baten inguruan: inpaktu sozial positiboa eta jasangarria sortzea.
Gipuzkoako Elikagaien Bankuan, esker ona adierazi nahi diegu inplikatutako pertsona eta erakunde guztiei. Lau urte geroago ere, proiektu honek erakusten du baliabideak hobeto aprobetxatzen direla eta elkartasuna urrunago iristen dela borondateak batzen direnean.
Sarea ehuntzen jarraitzen dugu elikagai gutxiago alferrik galtzeko, gehien behar duten familiei laguntzeko eta Gipuzkoan komunitate konprometitu bat indartzeko, jasangarritasuna eta justizia soziala elkarrekin direla.