AURTENGO UDABERRIKO KANPAINAK % 6,36 AREAGOTU DITU 2024KO EMAITZAK

GIPUZKOAK ELKARTASUNA ERAKUTSI DU BERRIZ ERE: AURTENGO UDABERRIKO KANPAINAK % 6,36 AREAGOTU DITU 2024KO EMAITZAK

BESTE BEHIN ERE, ALDE EDERRA ERAGIN DU GIPUZKOAREN ELKARTASUNAK

Elkartasuna Gipuzkoaren nortasunaren parte da. Aurten ere, herritarrek eskuzabaltasunez erantzun diote Gipuzkoako Elikagaien Bankuak 2026ko ekainaren 5ean eta 6an egindako Udaberriko Kanpainari. Emaitzak agerian uzten du gure lurraldeak gehien behar dutenekin duen konpromisoa.

Milaka pertsonaren parte-hartzeari esker, 255.951 kilo eta euro elikagai bildu dira bonu eta zuzeneko dohaintzetan; hau da, 2024ko kanpainan baino % 6,36 gehiago, orduan 253.299 kilo eta euro lortu baitziren.

Zifra horren atzean milaka keinu txiki daude, eta, guztiak batuta, lorpen garrantzitsua ahalbidetzen dute: Gipuzkoako milaka familiak elikadura duina izatea.

HAZTEN JARRAITZEN DUEN ERANTZUN SOLIDARIOA

Aurtengo edizioko datuek oso bilakaera positiboa erakusten dute, eta agerian gelditu da herritarren lankidetza funtsezkoa dela oraindik ere.

Hauxe da kanpainaren bidez guztira jasotakoa, zifratan:

• 296 kilo elikagai, kontuan izanik 2024an 94.000 kilo batu zirela.
• 737 euro bonu solidarioetan, hau da, herritarrek parte hartu duten supermerkatuetan erosita; iaz, berriz, 119.785 euro bildu ziren.
• 918 euro zuzeneko dohaintzetan, partikularrek nahiz elikadura-kateek beraiek eginda; aurreko edizioan 39.102 euro izan ziren.

Bonu eta zuzeneko dohaintzen bidezko ekarpen ekonomikoek beherakada txiki bat izan duten arren, orain bi urteko balantze globala baino handiagoa lortu dugu dohaintzan emandako elikagaien hazkunde handiari esker.

KOMUNITATE OSOAREKIN PARTEKATUTAKO ESKER ONA

Ondotxo dakigu Gipuzkoako Elikagaien Bankuan: ahalegin kolektiborik gabe, ez litzateke posible horrelako ezer. Helburu berarekin lan egiten duten pertsonek, enpresek, erakundeek eta boluntarioek osatutako sare solidario handi bat islatzen da kanpaina bakoitzarekin.

Horrenbestez, eskerrak eman nahi dizkiegu:

• Bilketa-guneetara beren ekarpena egitera hurbildu zareten milaka emaileoi.
• Egun horietan informazioa eskaintzeko, elikagaiak biltzeko eta kanpaina koordinatzeko denbora eman duzuen 500 boluntario ingururi.
• Ekimen honi ateak ireki dizkiozuen 92 supermerkatu eta establezimendu laguntzaileoi: 2 Alcampo hipermerkatu, 2 Carrefour hipermerkatu, UVESCO Taldeko 43 supermerkatu, Eroskiren 44 establezimendu, 10 Mercadona supermerkatu eta TodoTodo establezimendu 1.

Kolaboratzea erabaki duen pertsona bakoitzak lagundu du Gipuzkoako familia bakar bat ere uzten funtsezkorik gabe.

IGOERA BEREZIKI NABARMENA

Aurten izandako hazkundeak balio erantsia hartzen du azken ekitaldietako testuingurua aztertuz gero.

Carlos Martínez Gipuzkoako Elikagaien Bankuko presidenteorde eta bilketen arduradunak azaldu duenez:

“Aurten 118.296 kilo bildu dira, hau da, 2024ko edizioan baino % 20 gehiago, eta horrek berresten du Gipuzkoako gizarteak konpromiso etengabea duela gehien behar dutenekin, eta erakusten du, berebat, elikagaiak zuzenean ematea keinu garrantzitsua dela oraindik herritarrentzat”.

Gainera, komeni da gogoraraztea 2025eko kanpainak jada ezohiko erantzun bat erregistratu zuela, biltegiak ia hutsik gelditu baitziren 2024 amaierako DANAren ondoren sortutako ezohiko egoerak bultzatuta.

Horregatik, aurtengo Udaberriko Kanpainan lortutako igoerak esanahi berezia du. Erakusten du Gipuzkoaren elkartasunak ez diela erantzuten larrialdi-uneei soilik. Konpromiso horrek iraun egiten du denboran, eta berriz ere agerian gelditzen da pertsona ahulenek babesa behar dutela.

13.000 PERTSONA INGURURENGANA IRISTEN DEN LAGUNTZA

Bildutako kilo bakoitzak helmuga jakin bat du. Gipuzkoako Elikagaien Bankura iritsi diren elikagaiei esker, lurraldeko 13.000 pertsona ingururi erregularki banatu ahal izango zaizkie elikagaiak, gurekin lankidetzan ari diren gizarte erakundeen bidez.

Kanpaina horren bitartez, Elikagaien Bankuak bermatu du datorren udazkenera arteko hornidura, onuradun bakoitzak jasotzen duen oinarrizko saskia aldatu gabe. Gaur egun, pertsona bakoitzak 12 kilo elikagai jasotzen ditu hilabetean.

Sorta bakoitzaren atzean familiak, adinekoak, guraso bakarreko etxeak eta bestelako hainbat errealitate daude, eta funtsezko laguntza aurkitzen dute sare solidario horretan beren egunerokoari lasaitasun eta duintasun handiagoz aurre egiteko.

BILKETAREN ONDOREN BESTE LAN HANDI BAT HASTEN DA

Udaberriko kanpaina ez da amaitzen supermerkatuak ixten direnean. Une horretatik aurrera, ezinbesteko lan bat hasten da, elikagai guztiak baldintzarik onenetan irits daitezen behar dituztenengana.

Ekainaren 22tik 26rako astean, Gipuzkoako Elikagaien Bankuko boluntario-taldeak, beste 200 laguntzaile ingururekin batera, bildutako produktu guztiak sailkatu zituen.

Lan horretan, elikagaiak kategoriaka berrikusi, antolatu eta bereizten dira, ondoren errazago banatzeko lurraldeko gizarte-erakundeen artean.

Fase horretan ere, agerian gelditu da boluntarioen indarra. Pertsona horiek funtsezko eginkizun isil batean lagunduz eskaintzen dute beren denbora, eta haiei esker da posible laguntza modu antolatu eta eraginkorrean iristea.

ESKERRIK ASKO SARE SOLIDARIO HAU EHUNTZEN JARRAITZEAGATIK

Kanpaina bakoitzak berresten du pertsona askoren artean eraikitzen dela elkartasuna. Bilketa-kutxa batean utzitako elikagai batek, boluntariotzan emaniko ordu batzuek edo enpresa baten lankidetzak keinu txikiak dirudite banan-banan hartuta, baina, elkarrekin batuz gero, inpaktu izugarria sortzen dute.

Gipuzkoako Elikagaien Bankuan, eskerrik beroenak eman nahi dizkiegu herritar guztiei, boluntarioei, elikadura-kate laguntzaileei eta, oro har, Udaberriko Kanpaina hau posible egin duten pertsona guztiei.

Urte osoan buru-belarri jarraituko dugu lanean elikagaiak berreskuratzeko, xahuketa murrizteko eta premia handiena dutenengana iristen direla bermatzeko.