ELIKAGAIEN BANKUEN ARTEKO LANKIDETZA

MUGARIK GABE: EUROESKUALDEAK BAIONAKO, NAFARROAKO ETA GIPUZKOAKO ELIKAGAIEN BANKUEN ARTEKO LANKIDETZA BULTZATU DU, ELIKADURAREN ALORREAN BABESA SENDOTZEKO

Elkartasunak ez daki mugak zer diren. Misio bera duten erakundeek jakintza, baliabideak eta esperientziak batzen dituztenean, askoz ere urrunago irits daiteke haien lanaren inpaktua. Helburu horrekin, Baionako, Nafarroako eta Gipuzkoako Elikagaien Bankuek hilabeteak daramatzate lankidetza-harreman egonkor bat sendotzen, Akitania-Euskadi-Nafarroa Euroeskualdearen esparruan. Espazio horrek lankidetza bultzatzen du mugaren alde banatan, eta, aurrerantzean, erakunde bakoitzak bere lurraldean gero eta erantzun efizienteagoa ematea lortu nahi da.

Azken lan-bilera uztailaren 22an izan zen Iruñean, eta hiru erakundeek proiektu komunetan aurrera egiten jarraitu zuten, baliabideak optimizatzeko, elikagai-xahuketa murrizteko eta gehien behar duten pertsonei gero eta laguntza osoagoa eskaintzeko.

GAITASUNAK BATZEN DITUEN LANKIDETZA

Hiru elikagai-bankuok aldian-aldian egiten ditugu bilerak duela hilabete batzuetatik, definituta daukagun egutegiari jarraikiz, eta, saio horietan, esperientziak partekatzen ditugu, erronka komunak aztertzen ditugu eta hiru lurraldeetan aplika daitezkeen soluzioak bilatzen ditugu.

Erakunde bakoitzak bere inguruneko errealitate sozialera eta araudira egokituta garatzen du bere jarduera, baina guztiek helburu bera dute: elikagaiak berreskuratzea, xahuketa saihestea eta kalteberatasun-egoeran dauden pertsonei helaraztea, gizarte-erakundeen sare zabal baten bidez.

Lankidetza horrek posible egiten du elkarrengandik ikastea eta jardunbide egokiak identifikatzea, eta, ekimenak elkarrekin garatzen direnez, efizientzia handiagoa lortzen da banku bakoitzak bere aldetik jardunda baino.

Gipuzkoa, Nafarroa eta Baionaren arteko hurbiltasun geografikoak, gainera, sinergiak sortzen ditu, eta horrek zuzenean egiten die mesede elikagai-laguntzaren hartzaileei.

ELKARREKIN EROSTEA, URRUNAGO IRISTEKO AUKERA

Elikagaiak batera erosteko estrategia bat abian jartzea da orain arte lortutako akordio garrantzitsuenetako bat.

Helburua erraza da: mugaren alde batean zein bestean sortzen diren erosketa-baldintza onenak aprobetxatzea, eskura dauden baliabide ekonomikoak optimizatzeko eta nutrizio-balio handiko elikagaiak erosteko.

Hauek izan dira hautatutako lehenengo bi produktuak:

• Arrautzak
• Arroz-kontserbak halal oilaskoarekin.

Elikagai bereziki interesgarriak dira, proteinak ematen baitituzte, eta mantenugai hori funtsezko da onuradunek jasotzen duten oinarrizko saskia osatzeko.

Hasierako aurreikuspena da arrautzak Frantzian erostea, eta kontserbak, berriz, Espainian, merkatu bakoitzak eskaintzen dituen abantailak aprobetxatuz. Formula horren bidez, efizientzia handiagoa lortuko da erosketak egitean eta areagotu egingo da eskura dauden baliabideen errendimendua, banatutako elikagaien kalitateari uko egin gabe.

Kostuak optimizatzeaz gainera, hiru elikagai-bankuek elkarrekin eros ditzakete hirurentzat estrategikoak izan daitezkeen beste produktu batzuk.

ELIKAGAIEI BESTE BIZITZA BAT EMATEA

Interes handiena pizten duen beste lan-ildo bat elikagaiak aprobetxatzeko proiektuak garatzea da.

Askotan, frutak, barazkiak edo beste elikagai batzuk iristen dira, eta, propietate guztiak badauzkaten arren, bizitza erabilgarri mugatua dute edo berehala banatzea zailtzen duten ezaugarriak dituzte.

Produktu horiek zuku, pure edo bestelako elaborazio bihurtzeari esker, luzatu egiten da haien aprobetxamendua eta saihestu egiten da kontsumorako guztiz egokiak diren elikagaiak xahutzea.

Helburu horrekin, hain justu, datozen hilabeteetan aurreikusita dago elikagaiak eraldatzen espezializatutako enpresa bat bisitatzea Baionatik hurbil.

Ekimen horrek jada funtzionatzen du Baionako Elikagaien Bankuan, eta Euroeskualde osorako eredu partekatua bihur liteke. Hala, aukera gehiago sortuko dira elikagaiak berreskuratzeko eta eskuragarri dauden produktuen aukera handitzeko.

Adibide horrek erakusten du berrikuntza ere elkartasunaren parte izan daitekeela, eskura dagoen baliabide bakoitza hobeto aprobetxatzeko soluzioak bilatzea bultzatzen baitu.

NEKAZARITZAKO SOBERAKINAK PARTEKATZEA, LURRALDEA HOBETO APROBETXATZEKO

Baiona inguruan sortutako nekazaritza-soberakinekin lotuta dago mahai gainean dagoen beste proiektu bat.

Asmoa da produkzio horren parte bat Nafarroako eta Gipuzkoako Elikagaien Bankuekin partekatzeko aukera aztertzea, soberakinak sortzen direnean.

Lankidetza horrek posible egingo luke tokiko produktuak hobeto aprobetxatzea eta, aldi berean, hiru lurraldeetan artatutako pertsonei elikagai fresko gehiago eskaintzea.

Elikagai freskoek eginkizun oso garrantzitsua dute elikadura orekatu eta osasungarriaren barruan. Elikagai horien eskuragarritasuna handitu ahal izatea balio erantsi bat da elikadura-laguntza banatzen duten gizarte-erakundeentzat eta laguntza jasotzen duten familientzat.

ERRONKA ADMINISTRATIBOAK GAINDITZEA

Mugaz gaindiko lankidetzak gai teknikoei eta administratiboei aurre egitea ere eskatzen du.

Frantzia eta Espainia artean elikagaiak erosteko eta zirkulatzeko, bi herrialdeetan aplikatu beharreko araudiarekin lotutako zenbait prozedura aztertu behar dira, dela merkataritzaren eta logistikaren ikuspegitik, dela osasunaren ikuspegitik.

Horregatik, baterako lanaren parte garrantzitsu bat da tramite horiek aztertzea, proiektuak berme guztiekin eta dagokion lege-esparruaren barruan garatu ahal izateko.

Azterketa hori ez da ikusten oztopo gisa, baizik eta aukera bikaina da lankidetza sendoa eta egonkorra eraiki ahal izateko, datozen urteetan hazteko prestatua.

LAN PARTEKATUA, PERTSONAK HELBURU GISA HARTUTA

Euroeskualdeko elikagaien bankuen hurrengo bilera irailean izango da, Baionan. Lan-ildoak garatzen jarraitzeaz gainera, ordezkariek elikagaiak eraldatzeko enpresa bat bisitatuko dute, hain zuzen ere, dagoeneko Baionako Elikagaien Bankuarekin lanean diharduena.

Lankidetza horretan egiten den urrats bakoitza aukera ederra da eskura dauden baliabideak hobeto aprobetxatzeko, elikagai-xahuketa murrizteko eta hiru elikagai-bankuek beren lurraldeetan ematen duten erantzuna indartzeko.

Izan ere, elkartasunak mugak gainditzen dituenean, halaxe egiten dute sare indartsuago, efizienteago eta gizatiarrago bat eraikitzeko aukerek ere.